Saudi Arabia a lad amvoé ai Rusia. A dzeng fe na a nyian a ékoan be « BRICS »
Abui minnam da dzeng ne ba nyian a ékoan BRICS. Algeria a Afrika, Iran ai nala nala, bese ba sili ne ba zu a dzam té.
Asu Saudi Arabia, mbege edzoé yi a Sud-Afrika émen ényè a kuli foé té. Cyril Ramaphosa a nga be a dulu ésié a Saudi Arabia.
Cyril Ramaphosa a nga be a nen ngobi bivegele yi a nnam woe, SABC. Nde a nga dzo na : « Nkukuma [Saudi Arabia] Mohammed Ben Salmane Al Saoud, a sili na a zu nyian a be BRICS ».
. DZALEU.COM .
Ngul be BRICS e ne ve osu
Eyolé « BRICS » é ne nladan ai é minnam mi taan mi nga bonde ekoan té :
- Brezil,
- Rusia,
- India,
- China,
- Sud-Afrika.
N’yian Riyad [tsisoan osu yi a Saudi Arabia) wa kui abog ba Amerika be ne a bitoam. Riyad a ne nnam Amerika a nga be nladan ai wa abui. Nde Amerika a yi na Riyad a bede nkulan kalasina a yob. Nala na Amerika a bi mezen mefe asu émen ai Eropa, bolo Rusia a yi kig fe na a kuan ai bo kalasina woe.
Bolo Riyad a nga ben bo ane Amerika a yi, nde Washington a nga dzeng na a ku nyè wong. Nyè nyi na a zu nyè fed mimbè mi moni. To nala, Riyad a bisi kig. A nga ke ke ben dugan lad abui ai Rusia. Asu é bod ba fas politik yi a Emominlang, étié Riyad ya tilan na Saudi Arabia a ke ngam ai Rusia a bita Moscu a bo ai Eropa ai Amerika a Ukrenia.
Sud-Afrika a etoa édzoé be BRICS mbu wa zu
Cyril Ramaphosa a kuli fe foé na mbu wa zu wuina, nnam woé engo wa yi duru ekoan be BRICS.
Ndzoée yi a Sud-Afrika, nnam yi Afrika étam o ne a zang bebonde be esuan té, a dzo fe na mbu wa zu, é minnam mise mia dzeng ne mia nyian a be BRICS, mia yi bi éyalan. ©Dzaleu.com – O.B.
