Afrika Meyimbi-Me-Dzob : Yi Damiba a dzè édzoé a Burkina Faso?
A omos mewom bè ai nyina yi a ngoan osu yi mbu wui, é mod a dzoége Burkina Faso, Roch Marc Christian Kabore, a nga dzê etoa eyong bezimbi be nga tidan nyè. Dzam té a tong’o olun ayong bod a nga be a bele ai Kabore.
Abui bod á ngá be mintag na Kabore a ke ya, be tsog na énanga man bezimbi, Sandaogo Damiba, ya yi bô é mam nnam wa yi. Vedá, nguma mbu wui o nga ke ya, be Burkinabè ba be tô ve mô mô, be siligi na Damiba a ke ke ai bô vé. Yi a ne king ai be Fulansi ngekig ai étogan bá loé na be « Panafricanistes »?
. DZALEU.COM .
Binanga yi a Burkina ba dzo na be Fulansi be kodo nnam waba
Angogè, abui bod á ngá kui á nseng ne bá sili na be fulansi (bezimbi) be kodo nnam wábá. A tsisoan Bobo-Dioulasso, nen tsisoan akumá nnam, mikunda binanga bi siligi fe na Damiba á kodo étoa nge asikig dzam kaman ai bô.
Yi Damiba a dzê édzoé ana?
Omos wuina, sondo melu me bè, omos memana yi a ngoan ebulu, abui bod da til á ndal-bobo na be wog ane mengal ma dung a tsisoan Ouagadougou a dib kidi, éfa mbege édzoé a tô. ba til fe na anen ndá mefoé yi a nnam é kuu evol amu bezimbi be ke fe tele é dzam da bô na á wulu.
To ane é ne dzug á yem nge mefoé meté mese me ne nfang, abui mintil ai abui mengobi bivegele á ndal-bobo bia dzo na Damiba ane ai be Fulansi. Na, bezimbi befe á bá wog olun ai ékán a dudu mam, be dzeng ne bá noang étoa. Ai na, á zang bezimbi be té, mboag a ne Emmanuel Zoungrana.
Emmanuel Zoungrana, nya men fe ndoman mod ane Damiba, a ngá fudeban á mimbog á mekène me ngoan osu yi a mbu wui, man éban melu osusua yi na Kabore adzê étoa. Bod bezing ba dzo na Zoungrana é nyè abui bod á fidigi na a yi noang étoa. Asu dábá, Zoungrana á bada kig dzo na asikig king ai be Fulansi. Vedá Damiba enyè a ngá sô á memaná.
Damiba a dzô nnam na o tobo amieng
To ane bod bevog ba til na Damiba a dzê ya étoa nnam, man bezimbi té a til nguma mbándá á ndal-bobo Nda-Edzoé. To ane émen a yebe na mam me sikig á ngeeng, Damiba a dzo nnam ose na o tobo amieng.©Dzaleu.com
