Nyol bininga ai abum
Ntameni kobo é dzam ya bebe nyol bininga ai abum.
Amu é melu ma, é ne ane mininga a yene kig fe bi é ban mam ma namba nyol amvus abum.
Yene mininga a bié, mod ose a yanga na abum a dugan nyè tobo ve ane abum énanga, ne ekob é dugan nyè tobo ane ekob ngoan mininga adandang fe nge mininga té a wum.
. DZALEU.COM .
A mfang mfang, abui bininga, a kègè é ba ba wum, ma lindi akiae mama té.
Bo beben be ne osu a tobo alu yi amos a ndal-bobo ne ba lede befoda baba.
Bininga bo beben ba bo ve ane nyol dzaba ya yene kig bi to évus zing.
Veda to nala, ékan enying bod ya yanga na bininga be tobo tèkè ai évus a minson é ne ndzug dzam.
Abiali da tsende nyol mininga
Enying bod ya yene kig voan bebela té : abiali da tsende nyol mininga. Mombu milè amvus a na, é mininga evindi yi a Amerika ba loé na Porsha Williams a nga bi mindzug ai adzo abiali ai nyol.
Porsha Williams a nga ke a afola bivoe memdim ai moan mininga woé, nde a nga noang ban befoda. Bolo mininga té a wum, nde abui bod a nga kè na ba kobo ai nyè a ndal-bobo. Be dzo na a yene kig lede nyol dié nala amu abum a nga tsende nyè nyol.
Nde Porsha Williams a nga dugan ben noang befoda bevog ane élan. Nde a nga dzo bod na : « Ma buni na ndal-bobo é dang ya tsende ekan bod ba bebe nyol mininga. Abui benyia ba kad ma ékan amvus abiali, bod ba kpele bo amu ambu a nga bo na be nen ».
Bininga ba yene yebe nol dzaba amvus abié
Asu Porsha Williams, bininga ba yene kig vogolo nnemena é mam bod ba dzo bo amvus abiali.
« Bia bininga bia yene samba ai abog abiali, bia yene yebe na nyol dzaan é tsende. Bia yene ve bia beben abog asu yi na mam me dugan tobo ane osusua abum (…) Ma ding ékan abum ai abiali a nga tsende ma, ma buni na bininga ba yene bi akiae ntsogan té ». ©Dzaleu.com – A.B.
