Assimi Goita a ve nnam woé metaman

Assimi Goita a ve nnam woé metaman

Assimi Goita, é man bezimbi a dzoé nnam Mali, a kobo muna asu abog fili nnam. E ne omos wuina, sondo melu menyi yi a ngon ebul.

Mali a nga bi fili dzié a mbu 1962 ai Modibo Keita, mbege édzoé osu eyong be nga kodo a édzoé mintangan ya Fulansi. 

Assimi Goita a ve nnam ai meyong mese yi a Mali metaman :

1

Assimi Goita a sug fulu azombo meyong yi a Mali ai nkanga waba amu be nga zombo é mam mese Cedeao a nga bo bô tègè kuu soam. Asu Assimi Goita, nala na meyong yi a Mali ma yem ne é mod a yi fili a yene yebe é mindzug mia zu ai nyean té.

2

E bod ba noang ngab ai ékan nnam Mali wa sié ai é meyong mevoa yi a Emominlang be ne fe a metaman me Assimi Goita. Asu dzié, bod be té (ane Abdoulaye Diop) ba yem bege king Mali osu Emominlang.

Assimi Goita a ve fe abui ntsogan a é minnam mise mivoa mia voali Mali a zen fili dzié.

3

Binanga yi a Mali bia yene yem na ésié Assimi Goita ai é bezimbi be nga noang étoa, ya bebe fe boa. Asu té binanga bia yene kig tebe a mbaag é mam ma lodeban a Mali.

.

Bezimbi ai be ngomena yi a Mali ba bo mbembe esié

4

A ntol ébug woé, Assimi Goita a ve bezimbi yi a nnam olugu. A dzo na a ne mintag abui ai bô. A sug fe é ba bese be nga dzè enying asu yi na ba kaman ai Mali. Asu é ba ba koan ngekig na be nga bali eyong be kaman ai nnam, Assimi Goita a fidi na mvoae ya yi tobo ai bô avol avol.

Mbege ntum yi a Mali a sug fe é bod bese besikig bezimbi, a be nga dzè enying ai é bita Mali a dzugi ai biè.

5

Asu anen mvéndé yi a nnam, Assimi Goita a dzo na é mam mese ngul ekoan yi a nnam é nga tele, ma yi boban. Mvéndé osu yi a nnam ya yi tsendeban asu yi na é tobo nladan ai metum yi a Mali. Asu yi na é sié asu Mali.

6

Assimi Goita a sug fe ésié be ngomena yi a Mali, adandang é mam ma bebe enying bod, mebugeban ai akuma nnam. Ntol ébug Assimi Goita ase a ne a fulansi a é mam ngobi evegele a ne a si ntil wui. ©Dzaleu.com