Bia baala

Bia taman Noussierê KALALA OMOTUNDE

Bia taman Noussierê KALALA OMOTUNDE

Kalala Omotunde a nga be ekan akeng mod nda yem abui mam. Ntil bekalada, ngul a mam ai minlang yi okoba ai nala nala.

A nga wu a omos awom ai nyina yi aé ngoan nyina. Awu dié a nga namba abui bod a Si Afrika mbe dzamamu Omotunde a nga be a bo mbe ngul esié asu yi na metum yi a Afrika me dugan tebe ozondom.

. DZALEU.COM .

Yi mia yem nala?

Kalala Omotunde a nga be a Ongola Ewondo a memaman me ngoan awom yi a mbu wui.

Sondo é mbè osusua awu dié, étogan ba loé na « CERDOTOLA » (1) a nga tele nyè ane « Ntol Nyeme Metum yi a Afrika ». Omotunde a nga bi olugu té a metoban me Cerdotola. Mikunda bivindi ba sié asu metum yi Afrika be nga so a Ongola Ewondo asu metoban meté.

OBENGA yi a nnam Kongo, BIYOGO yi a Gabon, BANDA KANI yi a Kamerun, AMA MAZAMA, ntomba mininga evindi yi a mang ayat ai abui bod be nga noang melu me taan a ngoan awom, ne ba fas akiae afé Afrika a ne dzam dugan suguzu feg dié asu mebugeban moé.

Kalala Omotunde a nga biali a si Guadeloupa. men a ding kad dzo na, a kègè eyong a nga be énanga, a nga dzeng abui na yem efa Betara ai Benana boé be nga so. Bolo be yegele kig bo enying ai mam yi Afrika a Guadeloupa, nde a nga kè na a dzeng etam etam.

Edzom bod be ding fe a be Kalala Omotunde é ne na, a yemege kobo

A yemege yegele bod mam, adandang binanga. To ayege té a nga be ngul akiae afé, Omotunde a yeme bolo a yene kobo, é bibug a yene belan ai biè asu yi na mod ose a wog édzom a dzo.

Omotunde Kalala a nga til minkunda bekalada ba bebe nlang ai metum Betara ai Benana, adandang é ba be nga nying a Ta Mery (Si Egypten).

CERDOTOLA a nga biali a mbu toyina dia ai minted ebul ai mewom zemgbal ai zembal (1977)

CERDOTOLA a ne nguma étogan wa metum yi a Afrika. E minnam mi nga tele dzam té mi ne : Burundi, Kamerun, Kongo (Brazzaville), Nnam Centrafrika, Nen Kongo (Kinshasa), Tsad.

Amvus, nde minnam mife mi nga nyian été : Gabon, Guinea (Malabo), Ruanda, Angola ai Sao Tomé.©Dzaleu.com

(1) CERDOTOLA a tilan a nkobo fulansi na:
« Centre International de Recherche et de Documentation sur les Traditions et les Langues Africaines »