Nnam Burkina : Etéle étoa Ibrahim Traore
Ibrahim Traore a nga vaa Sandaogo Damiba étoa Burkina Faso a omos memana yi a ngoan ebulu yi a mbu wui.
Damiba émen a nga vaa Kabore, enyo a nga be mbege edzoé, a ngoan osu yi a mbu. Veda, ngoan moomo osu, enying bod yi a Burkina Faso, adandang binanga ai abui bezimbi, be wogo olun abui ai Damiba. Asu daba, a sié kig fe asu mfi nnam.
Asu té mikunda mi bod mi nga kui a nseng a ngoan ebulu. Be siligi na Damiba a kodo etoa. Nde be nga wulu a kele kui ane Ibrahim Traore ai efas bezimbi be nga vaa nyè.
. DZALEU.COM .
A sié asu mfi Burkina Faso
Asu Ibrahim Traore, a vaa Damiba étoa é nga boban asu yi na te nnam wa kuu a si.
Amu Damiba a kameni kig fe ai ayong.
A omos awom ai nyi, ai omos awom ai taan yi a ngoan, nnam ose o nga toban asu yi na wa fas ékan Burkina Faso a ne dzam ke osu. Amvus metoban meté, nde nnam o nga tele Ibrahim Traore ane ndzoé osu.
A sondo melu me bè, omos mewom bè ai mbog yi a ngoan, nen andzogondo wa duru mvendé nnam, o nga ve Ibrahim Traore ntum édzoé.
« Ma yili osu enying bod yi a nnam woan ai a nnem din wama ne ma yi kala, ma yi lugu, ma yi kaman ai nen mvende nnam waan, ne ma yi bo édzom ese ya yian asu yi na susuo a tobo a nnam waan« .
Bibug bi Ibrahim Traore bili osusua yi na a noang ntum édzoe.
Oyili Ibrahim Traore
« Ma yi kig lang nguma ntol ebug é kiri nyina.
Nnem wama engo wa yi kobo (…)
« Mindzug minzing mia yi kig tobo ngul asu yi na bi kuli nnam waan a é mintié o bele.
Oyili waan o ne na mvoae é dugan tobo a nnam.
Ve enying bod [yi a Burkina Faso] endzo bia bebe.
Endzo ya yi bia lede zen é ngoan mewom bè ai mbog ma yi duru nnam… »
Bibug bi Ibrahim Traore bili.
Ibrahim Traore , énanga mbege édzoé
Mkpamang mbege edzoe yi a Burkina Faso a bele mimbu mewom lè ai nyi.
A nga biali a omos awom ai nyi, ngoan lala yi a mbu 1988.
Ibrahim Traore a dzo be Burkinabè bese na :
« Mbaman ngul asu yi na bi man fog ai é ndzongo dzam ya degele nnam ».
« Burkina Faso ve osu !
Nnam waan ngekig awu, bia yi kiebe! »
Eyilega Ibrahim Traore dili, é bibug Thomas SANKARA, ntomba man Evindi, a kadege dzo abog ase. ©Dzaleu.com
